يعتبر الأدب الشعبي العربي في ليبيا من روائع الأدب الشعبي العربي نظرا لمايمتاز به من عمق ودلالة تعبيريه ولاسيما الفن الليبي المسمى ( غناوي العلم ) أو ( صوب الخليل )
وهو نوع من الأدب الشفاف يتألف من بيت واحد موصول أي بدون صدر وعجز إلا نادرا حينما يحافظ على نغمتة وإيقاعه الخاص في بيت ذو تفعيلة طويلة .
وقد تطور هذا الأدب المُركز والعميق أبان الإحتلال الطلياني البشع لليبيا مطلع القرن العشرين حيث عانى الشعب العربي الليبي من شتى أنواع التنكيل والتقتيل والهمجية الفاشية الإيطالية مماحدا بهذا الأدب الرائع ( غناوي العلم أو صوب الخليل ) أن يميل بشكل حاد إلى تعابير الألم الإنساني العميق نظراً لفراق الأحبة أو استشهادهم أورحيلهم أو غيابهم
وهذه بعض الأمثلة من هذا اللون التراثي الجميل :
غلاك ماتخاف عليه مرهون بين العين وهدبها . ياعلم
غريب في بلاد الغير قليل وين يزهى خاطري . ياعلم
ننهاك عن الغني ياعين ونلكاك في سريبه عايله . ( الغني هنا
هو المتزوج والمقصود أنها كلما نهت قلبها أوعينها عن متابعة حبيبها المتزوج تجد نفسها مجبورة للتفكير فيه مرة ثانية )
يسلم عليك العقل ويكولك نبيك ... أما خطاوي الرجل يصعب عليها تجيك . ياعلم
من طولت الرجا ياقسم أنخاف لو تجي مانعرفك . ياعلم
النوم والهنا والعقل مامشا لين شالهن . ياعلم
اتركهن وتنال الصير مالك سبب في دمعهن.
اتركهن تنال جميل مالك سبب في ذنبهن.
___________________
أنتي سبايبه ياعين غلا عزيز لولاك ما رسم.
اجعن دعاي يامرهون تلقاه في ضراري كبيدتك.
_________________________
اعزاز مالكين العقل ينساهم منامه يجيبهم
العقل ماينام الليل سطير جرح لولاف سمره
العقل يابعاد الدار يمسي معاي ويبات عندكم
العقل ماعطوه حقوق اصحاب الغلاء ظالمينه.
_______________
جريح ودمعتي سكلاب دارت سيل كي يوم المطر
جروحي صار لهن تهليع اشاظـن ما ينفع ترقيع
__________________
الافا لنهار يجول ,,, العقل داه مالليل ياعلم.
العقل واسع الجالات أضايق مع نار الغلا.
العقل ما ينام الليل سطير جرح لولاف سمره.
الـعـقل يابـعاد الـدار يـمـسي مـعاي ويـيات عـندكـم.
العقل في بلاد جهال؛ إن دار الغلا ياذوه ياعلم.
العقل ماعطوه حقوق اصحاب الغلا ضالمينه.
الدمع ما يجلي الياس أيزيدكن أرياف وتنعمن.
الدمع يوم ياس عزيز لو كان غيث لوطان أرجعن.
العين هدبها مفتول علي عزيز ياما باكيه
________________
العين وين قالت تاب مرهون دار به نين نقضه.
العين حاسبت لو قات لقت زمانها مايل بكت.
النار في قرار العقل نزلت ياعلم دار راكحه.
النار قايله للعقل أن صار يأس لولا ف ناخـذك.
الناس يحسبوك ربيع وأنت عذاب يانار الغلا.
الصبر خير واشوي ذنب واكثر جميل وأولي م البكا.
اللي بهم الصيف ربيع خشوا ا لجون ياعين باعدوا.
اللي صا يرة بالعقل سراقة بها ما تدري.
اللي غلاه في مرهون دواه صبر ياطول عازنه.
إينوس خاطري مهيوس من ياس ناس كانو له ونس.
بين الروا ياثاب دخان ياعلم نارا لغلا.
بلا قشوشه للنار تشيط نوحلو في ردمها.
بعد رديم الياس شقيت نار لولاف لهلبت.
بنيت قصر في لامال .... اكبر الياس جاني وهدمه.
بالك عليه تغلي ويبقالك عزيلة خاطري.
بلاك ما نريد انعيشن نفداك بالروح ياعلم .
تبقي حايسه وتموح عزيز وين عيني تنظره.
بعد بكاه وان تغيب نقص عزيز ما نامن لحد.
تقد يعك علي لوهام بلا نصيب ياعين تجهلي.
تنهاهن يديرن عزم يجيهن الليل ويذرفن.
تها يولها واسمرت العين وين ما لاج نومها.
ترجاك والرجاء في الله العين ياعلم ما ميسه
_____________________
تبقي حايسه وتموح عزيز وين عيني تنظره.
تشيط في خفا وتبان سبيل عادة النار ياعلم.
تاكل بلا دخان جواني دقيله نارهم.
ترجي العين تاسع ياس ترقيع في غلا بايد لها.
تذوح في عقاب الدار تلقي عزيز هيال بالها.
تصليب جابها ع الكبد خبير ياعلم نارا لغلا.
تقول شاطات اليوم غيات ياعلم باد جيلهن.
توا روا وهم حيين عرب أجواد كانوايفعلوا
ثلاث هن دوا المريض ان جن يموت وان غابن بري.
جبد سريب جابك فيه بكا العقل ما حوته سكت.
جضيض خاطري م ألنار بكي جميع مولاي ما خلق.
جرت عليه نار عزيز العقل نين شاكي خالقه
جروح يا عزيز غلاك م الغيبه برايا ع العدم.
حرثن فيه نين جبرن شلال دمعتي يوم ياسهم.
حتي والمواوير يـاس غلا عزيزنا ما نتركه.
حتي وهو عذاب سنين يغات ا لمراهين فاكه.
حتي وانت فيك الياس خلق الله توقاتك فرج.
حال غايتي في الصوب وان صار الخطا مانحضره.
حتي وأنت فيك الياس خلق الله توقاتك فرج.
خليت ياعزيز ألعقل جنازه بلاروح واقفة.
خلاني صفا ليام نشاكي اللي مانشغله.
خلا ني غلا مرهون نشاكي الدانون ياعلم.
خلا ني غلا مرهون نموج في هواء ماله سند.
خلاك حايره في ألراي غلا عزيز ياعين هو أللي.
خطر ودار لك مشغال عزيز قبل يا عين ناسيه.
خاطر عليك عزيزا ليوم وامس يا عين باكيه.
خطاهم اللي داروه قبلوا جميل هانوا با علي.
خلفت ياعزيز معاي فواهق بنيران يطلقن.
خطاك باعزيز معاي كبير غير كاميه خاطري.
خطاك من خطاك معاي سبق خطاك كافيت بالخطا.
خطرها خطاك العيب اللي معاي جا ما لا سبب.
خذيته وصار أمعاك رفيق زين ماهو أمطالقك.
خلينهن ضلل في قيظ؛ يا عزيز حيران خاطري.
خوفنا بعد توبات جرونا مراهين ما فضوا.
دموعي علي لولاف شلال كيف ماره فالجبل.
ديما قبال العين سوا بعاد والا يقربوا.
دموعي علي لولاف أسقطن في صفاء دارن حفر.
دموعك عليه كبار غلا عزيز يا عين ذيبلك.
_________________
العين راضية بمنام ***** تشوف عزيز فيه وتنعمى
____________
لوكان غير جار احملت منى وعلى واغلى وباعنى
___________________
الفاضى اقول قصير مطول الليل على ما رقد
_________________________
بعد رحيلهم لولاف رانى برهت يالولا البكا
____________________
امرايف اعزاز خطروا نبكى هنا يا لولا الحيا
_______________________
على ما ايسير وصار ننظر الغير نرضى ابفاهقى
___________________________
تبكيه ترجيه تنسيه تجحديه تشكيه مو جايك
____________________
اللي ينشدك ياعين قولي بكيتي مالمرض
______________________
اتبات كل يوم بياس واتنوض شايلة لوعة الغلا
__________________________
عند العين سماحة جضة عالمرهون وهى اتوضى
________________________________
الغاية بعد حوسات تلقى مكان عينى للبكا
______________________________
مالك فزع ياعين امفيت قولتك يانا على
_____________________________
حتى قبل لمغالاة منام الليل مانى موالفة
____________________________
يبقى حزين نين ايموت الخاطر عزا فى فراقهم
________________________
العقل ما ينام الليل سطير جرح لولاف سمره
___________________________
الـعـقل يابـعاد الـدار يـمـسي مـعاي ويـيات عـندكـم
___________________________
العقل في بلاد جهال؛ إن دار الغلا ياذوه ياعلم
_____________________________
العقل ماعطوه حقوق اصحاب الغلا ضالمينه
____________________________
الدمع ما يجلي الياس أيزيدكن أرياف وتنعمن
_____________________
الدمع يوم ياس عزيز لو كان غيث لوطان أرجعن
______________
العين قابلت ووزنت والعقل قال ما كيفك علم
___________________________
العين شوقها مرهون والفاضي اغباوه دايره
___________________
ما اتسير غير صارتلى مرسولى اطمع فى جارحى
____________
فالعين ما اتخلى دمع مرهون قبل دارا انطولها
______________
ليلة وداع عزيز بكيت نين سالولى اشفق
________________
نحسابها اعماى اهمدت مكبورة الغلا نين جورت
________________________
هناك كاينه كى هذى امجاور عزيز اوميسا
___________________
درنا سبر نا والعين تقديعنا على دار الغنى
________________________
ربيعى مولى صيف بعد عزيز يانا المندقل
________________
العين رابطة واتسال الهالب اللى شور دارهم
__________________
للدار كل يوم رحيــــــــــــــل للعين قيس مو قاسم ونس
___________________________
يا العين من خصص ليدين عليك ضاع ما غير الغلا
______________________
امفيت صفق ليد عاليد غنو عزيز هذى فزعتى
_____________________________
الياس ما القى ما يدير القى احداى لولاف قلهم
_________________________
الياس دارنى ملهاة ابعدك ياعلم كان نشغلك
________________________
لوكان المنام يصير حلمت بالغني جايني فضي
ولوكان تحلمي بعزيز حتى منام ياعين سادك
وحلامة تجيب عزيز تريد نوم والنوم منقطع
______________________
الخاطر وحل فى ناس ....نوى تركهم زادو غلا.
*ذوين نقعد انا وافكارى ...نلقى جيش الياس طوارى.
*ياسى مانوى تحويله ...دق خيام وجاب عويله.
*نور العين علم فى جيله ...بين الناس قليل مثيله.
انظارى واشواقى والبال ...ايراجن فى زوله مازال.
*عندى عين شكى ما تشكى ...لاكن وين ترايف تبكى.
غلا عزيز كيف الحبق فايح في حساء خاطري . ياعلم
عليه رقرقن لنضار عزيز وين مواله خطر . ياعلم
نحساب ياعزيز الصوب سهاري عرب نين لاعني . ياعلم
اللي قبل هومشكاك للناس كيف تشكي بسيته . ياعلم
عزيز والعزيز عزيز ويبقى عزيز ليوم لاخره . ياعلم
زعم ياعزيز امعاي والا شاقي بحوال غيرنا . ياعلم
الشمس ياعزيز اتغيب ان جا نباك شاقي بغيرنا . ياعلم
فراق عزيز كي فراق الروح وفراق الروح لو ريت مصعبا . ياعلم
يستاهل دموع اكبار عزيز ماتجيبه فكفكه . ياعلم
لوكان الغلا بالسيف علي لعطاب ان ناخذك .ياعلم
{ نلاحظ هنا مفردة ياعلم نهاية كل بيت لإعلان نهايته }
الرئيسية
.gif)
